قصتنا مع الفنان المشهور

اليوم رح طل عليكم بقصة من الآخر أنا متأكدة كتيييير رح تعجبكم :)

بس أول شي خليني اقول لا تسدقوا كتير العنوان وتفكروا انه عنجد قابلنا رسام مشهور ، هو صحيح رسام بس ولا يمكن لأي إنسان يكون سمع عنه ، ولو شافو أكيد رح يعرف إنه .... ولا لليش أخربها لازم يكون في تشويق .

خليني أبلش بالحكاية لانه فعلا متل الي بصير بالافلام (زي العنجد يعني ) ،اليوم طلعت أنا وهالمحروسة اختي على مكان (كوفي شوب) بس مافي داعي لذكر الاسماء ، رحنا وعين الله علينا واعدنا وانبسطنا وأكيد كان في كتير نشاطات نعملها من بين هاي النشاطات الكتير شيقة وحلوة ومسلية ، اتفاجأنا بجية واحد عالساحة مبستم وما أحلاه مبسووووط ، لف عند كل الطاولات بس ما حدا عبره يعني يا حرام فشلووه :( ، بس انا وأختي كتيير مناح، اجا لعنا طبعا مو فاهمين شو القصة ،طلع الزلمة رسام !! وحابب يعمل لوحدة فينا لوحة فنية نحلف فيها ، بلش هون الاحراج واحنا كتير مناح برجع بكرر، فقبلت اختي انه يرسمها .

باشر هالفنان رسمه وهالابتسامه على تمه شي بيشرح القلب ، وراح يحكي بس يا ترى شو حكى هون السؤال ، خلينا نقول من هون بلشت القصة.

صار هاد الفنان الموهوب يحكيلنا عن آرائه ولا بس احنا هون منحكي عن آراءنا لا الكل الكيد عند رأي وعنده أفكار خلينا نشوف شو كانت أفكاره.

أول شي اتفاجأنا بإنه عمره بس 29 !! مع إني متأكدة انه بالميت 35 بس ما علينا بالعمر الله يعطيه طولة العمر ، هاد الفنان يا جماعة بحتقر العرب قال احنا ناس مو عايشين ما عنا حرية ما عنا احترام للذات ، يعني قبل ما اقول اذا انا بوافقه الرأي او لا خليني أكمل شو كمان حكى وعبر، هاد الانسان مكمل بس توجيهي يعني خلص مدرسة من هون وأعد ووهب نفسه للفن يا أخي ما أحسنه !!

هو من رأيه انه شاف وعاش كتير ومتله ما حدا شاف ولا حيشوف ليش الله اعلم

أولا هو بقدس المرأة كتير وبيحلف إنه لو لقى بنت الحلال لكان هناها وعيشها عيشة مو طبيعية وكان عملها تمائيل ولوحات زيتية وقدرها كتير بس مافي ، كتير مر عليه بنات ونسوان بس ولا وحدة حبته واذا فيهم وحده حبته هو ما بتخرط مشطه يعني بالعربي ما بتعجبه ، كلهم مغرورات وما بيقدروا الفن، ليش يا عالم بيكاسو بيكاسووووو ما غيروووو كان متزوج 6 واخر وحدة فيهم كانت رسامة أصلا ما كان ينجذبله غير الفنانات متله هلا ما اختلفنا يا عمي إنك مثقف بس المهم خلصنا ،اخر وحدة فيهم لما انفصلوا عن بعض قصدي عن بيكاسو ومرته بعدوا كل الناس عنها ،وهو نفسه قلها إنه بما معناه الناس ما قربوا عليكي لانه حبوكي بس لانهم حسوا فيكي لمستي انا واحساسي انا، يعني باختصار حبوها عشانه هو ، طيب ما اختلفنا بس هلا هاد شو دخله فيك ؟؟؟ يعني انت متلا متله ؟؟ الاكتشاف العظيم كان إنه يمكن احنا طلبة كلية الفنون السنافر بنعرف نرسم احسن منه !! ما بدي ابهر الموضوع كتير هو رسم وتعب بس مالها علاقة الرسمة باختي ابدا ،حلوة ما اختلفنا بس يعني مين الاخت المرسومة؟؟

هو كتير انعجب باختي لدرجة انه الادب فيه وصل انه يسألها انتي مرتبطة وقالتله اه وبلا هلا ما افوتكم بالحبط اكتر بس كان كتير مصر انه وحدة فينا بطل يهمه بالاخير مين فينا بس المهم وحدة تكون صديقة اله يعني صديقة تمشي معه في درب الفن(وقاحة غير شكل )!! قال بحكي والله انتوا بنات كتير موهوبات وعجبتوني كتير ، طبعا كان يفوتني بالنص يحشرني يعني لاني اني طفسته كتير وعملتله شاب الحارة ، لما حاول يتغزل (لا تستغربوا اه حاول )ويعمل من حاله شاعر مو بس رسام قلتله عمووو هاي اختي وبغار انا عليها (بحاول ابينلكم الوجه الكويس والمؤدب في أحسن ما جد تنفصموا هلا كيف رديت عليه وتخافوا مني )استحى شوي ولكن ليس كثيرا.

وكمل كلامه،وحتى المغنيين مو عاجبينه ،وكان بيحكي وهو كتير منفعل :"هاد يا عالم مو فن واحنا مو بشر بس الحياة عنا أرجيلة وبس ،والعقلانية عنا ما فيها أي تقدير، للفن وإنك بس تحمل حالك كل يوم عالقهوة وتأرجل ( هو في منه الحكي بس ما علينا حالياه منتاقش بس أخلص )" وكمان طلع بحب كتير أبو وديع وكاظم ويمكن هاي الشغلة الوحيدة الي خلتني اتحمله لشوف وين اخرتها معه.

الزلمة كيتر متأثر بالجو والبيئة الخربانة الي عم نعيشها احنا حاليا وبرأيه انه اكيد ما عاد بهيك زمن أغبر معنى للحب وانه حاول كتير يشوف بنت تفهم عليه ويحبها بس ما لقى وبيحلف انه ما حيلاقي ،حاولنا كتير نقنعه انه اعطي لحالك كمان فرصة لساتك شباب يا اخي قال لأ مستحيل ما عاد في هيك شي .

وكما أضاف أيضا انه جميع النساء بهبن منه ( بخافوا منه ) قال هو كتير صريح واحنا البنات بنضل نقول منحب الصراحة بس اخر شي ببين انه احنا منكره الصراحة ،وما عنا استعداد للمواجهة ، في جملة قالها انه لازم نقدر النساء متل ما عملوا الرسامين والفنانين متل ليوناردو وبيكاسو وسلفادور وغيرهم، احنا ردينا عليه انه لازم بالاول البنت نفسها تقدر حالها وتعطي قيمة لنفسها وتثبت وجودها بكل احترام"،راح ناقض كلامه الي قاله من شوي بالبداية وقال :"اه والله البنت اذا ما كانت هيه حاسة بقيمة نفسها وما اتعاملت مع الناس وحسستهم بتقديرها لشخصيتها ولذاتها ماحيقدر اي رجال بالعالم يقدرها.

لحد هون بكفي نم وغيبة عالعالم بكفي هاي النبذة عن فنان العصر وفعلا انا كتير احترمته وقدرته .

احكولي انتوا هلا شو رأيكم بفنان الجيل الصاعد ؟ واكيد انا رح اشارك واقول رأيي بس من بعد ما اسمع رأيكم

واسفة طولت بالكتابة بس الموضوع شيق وانا افشل وحدة بعملية الاختصار

مع تحياتي ،ويارب سامحني حشيت بالزلمة كتير