على مستشفى الأمير حمزة يا معلم

أول امبارح صارت معي مغامرة جديدة ، بس بتعرفوا من اي نوع هاي المغامرة ؟؟
هاي وحدة من مغامراتي مع التكاسي :D
. واحلى شي بالحياة تعيش مغامراتك مع شوفيرية التكاسي اسألوني إلي انا

ركبت التاكسي بقله وديني بالله على مستشفى الامير حمزة ( أحد المستشفيات العريقة هون بعمان)، سألني عالمستشفى نفسه ؟؟ قلتله اه يا ملعم عليه نفسه ، ومشينا .
وصلنا لنقطة انا بصراحة ما بعرف من عندها من وين لازم نروح ، بس انه الطبيعي مدامني راكبة تاكسي يكون هو الي بيعرف الطريق مو انا !! وغير هيك مستشفى اذا ما بيعرفه كان لازم يحكيلي لانه هاد مو بيت صاحبيتي ولا بيتي اكون حافظيته واعد ادله عليه
نرجع للموضوع ، وصلنا قبل دوار بسموه دوار المشاغل ، صار يسألني هلا من وين يمين ولا نطلع عالدوار ؟؟ قلتله انا ما بعرف الطريق بالزبط ، ومع هيك رنيت على صاحبيتي الي كنت بدي التقي فيها عند المستشفى وسألتها ، قلتلها انا عند كذا كذا من وين هلا اروح ؟ بس المحروسة طلعت مو فاهمة علي انا وين بالزبط.
فراح هو وأخد قبل الدوار يمين ، والبنت بتحكيلي قال لازم تروحي ابصر من وين ، فسكرت منها وطنشتها
فقلت لسواق التاكسي هلا انت ما بتعرف يعني المستشفى هاد وين ؟ حكالي يعني انتي بدك المستشفى نفسه ؟ (لو لاحظتوا هاد السؤال انسأل أول ما ركبت التاكسي بس للتوكيد يعني عم يرجع يسألني!) رديت عليه وانا شو حكيتلك اول ما ركبت بدي اوصل المستشفى نفسه ؟! حكالي ما انا قال بحب دايما اعمل احطياطي لانه بالعادة الراكب بطلع بقول شي وبنص الطريق بصير بدو يروح مكان تاني ، يعني بقول بدي اوصل مستشفى ولا مكان معين ولا هو بصير بدو يدخل دخلات ويوصل لمكان تاني !! قلتله انا لو بدي اي شي تاني كان حكيتلك يا عزيزي . قلي خلص ما عليكي اصلا هاد الطريق كمان بودي ، قلت يلا لنشوف لوين بدنا نوصل ، بس فعلا وصلت للمكان الي بدي ياه والحمدلله طلع مافي ولأول مرة بالحياة لف ودوران ، بس شكله ما صحتله فرصة لاني كنت كتير متشنجة وانا آعدة .
بس المفاجأة كانت ، بس نزلت بحكيلي بتحبي تاخدي رقمي ارجع اخدك !!! مع العلم كان حاطط اغنية فيها الرسول و الله والاسلام ومش عارفة شو ،يعني أنشودة دينية !! هلا ممكن بعضكم يقول لنفترض حسن النية فيه ، بس لو ظنيت نية منيحة فكل واحد كان من زمان الله اعلم شو صار ، بالذات هيك اشكال ما بتنعطى عين بالمرة، وسدقوني ما كان في مجال لحسن الظن بالمرة ، اسألوني إلي

تحياتي ، وان شا الله بس تصير مغامرة جديدة مسلية مع شوفير تاكسي معتر من شوفيرية التكاسي العظيمة المعبية البلد بحكيلكم كمان عنها ، هو صار كتير مغامرات قبل بس ناسية حاليا ،واحنا خلينا بالجديد احسن من القديم